30 мыңнан астам қазақстандық пен елорда қонақтары Леонардо да Винчидің «Әдемі ханшайым» — La Bella Principessa туындысын тамашалады.

Әйгілі суретшінің таңғажайып картинасы Италияның Қазақстандағы елшілігі, ForteBank, Mastercard, Scripta Maneant, Италияның мәдениет институты мен ҚР Мәдениет және ақпарат министрлігінің күш-жігерінің арқасында Астанадағы Ұлттық музейге қойылды.

Көрмені ең алғашқы боп президент Қасым-Жомарт Тоқаев тамашалады. Ақорданың хабарлауынша, Мемлекет басшысы маусым айының басында Ұлттық музейге барып, отандық және әлемдік бейнелеу өнері туындыларын көріп қайтқан. Сондай-ақ Президентке La Bella Principessa картинасы көрсетілді.

Көрменің ашылуы Ұлттық музейдің он жылдық мерейтойымен және картинаның 528-ші туған күнімен тұспа-тұс келді.

Астанада көрмен өткізу идеясын Италияның Қазақстандағы елшісі Марко Альберти ұсынған еді. La Bella Principessa шоуына дайындық алты айға созылды, ал да Винчидің картинасын сақтандыру құны шамамен 200 миллион еуроны құрайды.

La Bella Principessa – Леонардо да Винчидің XV ғасырдың аяғында салған туындысы, онда итальяндық ақсүйектер отбасынан шыққан жас қыздың портреті бейнеленген. Суретшінің жұмысы бүкіл әлем бойынша бес рет қана көрмеге қойылды.

Ұйымдастырушылардың пікірінше, көрме — елордада Да Винчи картинасын көрсету мүмкіндігі ғана емес, сонымен қатар Қазақстан мен Италия арасындағы мәдени байланыс пен алмасуды дамытуға жасалған қадам Әйгілі суретшінің шедеврін көруге санаулы күндер қалды. Көрме 4 тамызға дейін жалғасады. Сенбі және жексенбі күндері ҚР Ұлттық музейі сағат 10:00-ден 18:00-ге дейін, касса сағат 17:00-ге дейін жұмыс істейді.