ForteBank қолдауымен «Пиноккио» алғаш рет қазақ тіліне толық аударылды

Астанада Карло Коллодидің «Пиноккионың басынан кешкендері» туындысының қазақ тіліндегі толық аудармасының таныстырылымы өтті. Кітап алғаш рет тікелей итальян тіліндегі түпнұсқадан аударылып, автордың туғанына 200 жыл толуы қарсаңында жарық көрді. Жобаның бас демеушісі –ForteBank.
Әлем балалар әдебиетінің жауһары енді қазақстандық оқырмандарға ана тілімізде қолжетімді. Шығарма ешқандай қысқартусыз, автордың толық түпнұсқасы бойынша аударылды.
Кітапты Steppe & World баспасы жарыққа шығарды. Жоба Карло Коллоди Ұлттық қорының қолдауымен, Италияның Қазақстандағы Елшілігі және Алматыдағы Итальян мәдениет институтымен бірлесе жүзеге асты.Шығарманы қазақ тіліне аударған – Абылай Сұлтан, редактор-құрастырушысы – Раиса Кадер. Кітаптың түпнұсқа суреттерін қазақстандық суретші Сұлтанбек Айтжанов салды. Сонымен қатар басылым арнайы қосымша материалдармен толықтырылған. Онда итальян тілі мен әдебиетінің маманы Франко Нембринидің мұғалімдерге арналған әдістемелік кеңестері және жазушы әрі тарихшы Джордано Бруно Герридің мақаласы берілген.
Іс-шараға ҚР Мәдениет және ақпарат вице-министрі Рустам Әли, Италияның Қазақстандағы Елшісі Антонелло Де Риу, Алматыдағы Итальян мәдениет институтының директоры Эдоардо Кризафулли, Карло Коллодидің 200 жылдық мерейтойына арналған Ұлттық комитеттің төрағасы Джордано Бруно Герри сондай-ақ баспа саласының өкілдері, жоба серіктестері мен кітапсүйер қауым қатысты.
«Қазақ тілін қолдау мен дамыту – Forte-нің басты басымдықтарының бірі. Ана тіліне деген сүйіспеншілік алғаш оқыған кітаптан басталады. Балалардың әлемдегі ең танымал ертегілердің бірін қазақша оқып, қазақ тілінің шұрайын сезіне алатынына қуаныштымыз. Бұл кітапты италиялық достарымызбен бірге Қазақстанда дайындап шығардық, бірлескен істің нәтежиесін мақтан тұтамыз», – деп атап өтті ForteBank басқарушы директоры, Chief Premier Banking Officer Мухаббат Сеитова.
«Пиноккионы» қазақша сөйлету – есею, жауапкершілік пен адамгершілік жайлы баршаға таныс оқиға арқылы жас ұрпақты Италия мәдениетіне жақындата түсу.Бұл – екі ел арасындағы достық пен өзара түсіністікті нығайтуға қосылған үлес. Сондай-ақ қазақ тіліне, оның өзіндік болмысы мен мәдениетіне деген зор құрметтің белгісі. Нағыз мәдени байланыс дәл осылай орнайды: бір елдің рухани мұрасы өзара сыйластық негізінде өзге халықтың тілінде сөйлей бастайды. Осы жобаны жүзеге асыруға зор ынта-жігермен және табандылықпен атсалысқан Раиса Кадерге алғыс айтамын», – деп Италияның Қазақстандағы Елшісі Антонелло Де Риу ықыласын білдірді.
ForteBank пен Италияның Қазақстандағы Елшілігі мәдениет саласында көп жылдан бері тығыз әріптестік орнатып келеді. 2027 жылы бұл жоба жалғасын тауып, Қазақстанның қалаларында кітаптың таныстырылымы өтеді. Сондай-ақ заманауи өнер, дизайн және кино салаларын тоғыстыратын Пиноккиоға арналған арнайы іс-шаралар жоспарланған.