«Қазақстан қор биржасы» АҚ 2022 жылғы жылдық есептер байқауының қорытындысын шығарды. ForteBank-тің жылдық есебі қаржы секторындағы ең үздік жылдық есеп болып танылды. «Қазақстан тұрғын үй компаниясы» АҚ және «Qazaqstan Investment Corporation» АҚ жүлдегерлер ретінде марапатталды.

KASE Қазақстанда жоғары сапалы қаржылық емес есептілікті дайындау тәжірибесін дамыту мақсатында 2022 жылдан бастап жылдық есептер байқауын өткізуде. Бұған дейін аталған байқауды «Эксперт РА Қазақстан» және «QRA» рейтинг агенттіктері өткізген болатын. Биржа әртүрлі сипаттамаларды ескеретін жылдық есептерді бағалау тәртібін әзірледі: барлығы 150-ге жуық критерий бойынша, оның ішінде мазмұны, ақпаратты ашудың толықтығы және жылдық есептің ресімделуі бойынша бағаланады.

«ForteBank» АҚ халықаралық қатынастар бағытының жетекші банкирі Ксения Угрюмованың айтуынша, «Қазақстан қор биржасының сарапшылары командамыздың еңбегін жоғары бағалаған. Банкіміздің жылдық есептері бірнеше рет ұлттық және халықаралық конкурстардың әртүрлі номинацияларын иеленген, бірақ «Қаржы секторындағы ең үздік жылдық есеп» номинациясы бойынша бірінші рет марапатталды».

Байқауға Қазақстан Республикасының резиденті болып табылатын заңды тұлғалардың 2022 жылғы жылдық есептері мен тұрақты даму туралы есептері қатысты. Жылдық есептерді бағалауды KASE қызметкерлері, сондай-ақ бағалау және жылдық есептерді дайындау саласындағы қазақстандық сарапшылар жүргізеді.

Жылдық есеп – бұл қаржылық есептілік, аналитика және публицистика элементтерінен құралатын құжат. Жылдық есептің мақсаты – оқырмандарды есепті жылдағы қаржылық қызмет нәтижелерімен таныстыру ғана емес, сонымен қатар өзі туралы қаржылық емес ақпаратты ашып көрсету: миссиясы мен стратегиясын сипаттау, корпоративтік этика және операциялық орта туралы әңгімелеу, қызмет пен дамудағы маңызды мәселелерді ескеру және т.б.