Қазақстандық паралимпиадалық теннисшілер 2024 жылы қандай жетістіктерге жетті?
Спортшылар алғаш рет халықаралық турнирдің жартылай финалына шықты, арбадағы теннистен әйелдер ұлттық құрамасының өкілдері 200 үздіктің қатарына кірді
24.12.2024 г.
2024 жыл аяқталуға жақын, енді өткенді бір шолып, Қазақстандағы паралимпиадалық спорттың осы түрінің дамуы туралы айтып өткен жөн. Биылғы жыл маңызды болды: ұлттық паралимпиада құрамасы халықаралық турнирлерге алғаш рет қатысты, ірі жарыстар мен жаттықтырушыларға арналған семинарлар ұйымдастырылды. Спортшылар мен жаттықтырушылар жұмысының нәтижелері, сондай-ақ демеушілік қолдаулар өз жемісін берді: қазақстандық арбадағы теннисшілер әлемдік рейтингіге көтеріліп, жобаның өзі 10 қаланы – Астана, Алматы, Ақтөбе, Қарағанды, Шымкент, Орал, Ақтау, Атырау, Өскемен, Қызылорданы қамтыды және оған 10-54 жас аралығындағы 200-ден астам астам адам қатысты.
«Paralympic Sports Association» қоғамдық қорының «ForteBank» АҚ-мен ынтымақтастығы елімізде паралимпиада теннисінің жаңа болашағын құруға көмектеседі.
2024 жылдың қорытындысы
"Біз халықаралық турнирлерден жүлдесіз оралған емеспіз. Қазақстанда паралимпиадалық теннис қарқынды дамып жатыр: бірнеше қаладан бастау алған бағдарлама бүгінгі күні он қаланы қамтиды. Бұл спорт түрі ел үшін маңызды рөл атқарады, өйткені оның кәсіби негізі ғана емес, сонымен қатар спортшылар үшін қаржылық болашағы бар: ITF (Халықаралық теннис федерациясы) шеңберінде жыл сайын 150 коммерциялық турнир өткізіледі. Сондай-ақ теннис Қазақстанда арбадағы баскетбол және регби ойындарымен қатар үш ресми паралимпиада тармағының бірі болып табылады", – деп атап өтті " Paralympic Sports Association" ҚҚ басшысы, «Теннис федерациясы» РҚБ Инклюзивті даму департаментінің кураторы және ҚР ұлттық құрамасының (СДО) аға тренері Сергей Селиванов.
Қор мүмкіндігі шектеулі балалар мен ересектерге денсаулығын қалпына келтіріп қана қоймай, өмірдің жаңа мәнін табуға көмектеседі. Мұнда оңалту, әлеуметтендіру және спорттық даярлау жүргізіледі. Көзделген сабақтар қатарында иппотерапия, паралимпиада спорты, емдік дене шынықтыру (ЕДШ), рефлексотерапия және массаж бар.
Мүмкіндігі шектеулі адам өз қаласындағы теннис орталығына барып, паралимпиада теннисін ойнай алады. Сергей Селиванов атап өткендей, процесс өте оңай, іс жүзінде бұл спортпен шұғылданғысы келген адамдарға жаттығу мүмкіндігін бермеу жағдайы орын алмаған.
Жағдайының ерекшеліктеріне сәйкес осы спорт түрі бойынша дами алатындар үшін спорттық топтар ашылған. Дене бітіміндегі шектеулерге байланысты әлемдік деңгейге жету қиынға соғатындар үшін сауықтыру сабақтары ұсынылады. Бұл әрбір адамға денсаулығын жақсартуға, белсенді өмір салтын сақтауға және спорттық қоғамдастықтың бір бөлігі болуға мүмкіндік береді.
Қазақстандағы паралимпиадалық теннистің дамуында демеушілердің қолдауы маңызды рөл атқарады. Осы ынтымақтастықтың арқасында, Сергей Селивановтың айтуынша, соңғы екі жылда ұлттық құраманың жетекші ойыншыларына шәкіртақы төленуде, бұл олардың кәсіби өсуіне ықпал етеді және ынталандырады.
"Paralympic Sports Association іске асыратын идеялар мен жобалар мүмкіндігі шектеулі көптеген адамдарды жаңа жетістіктерге жетуге шабыттандырып, Қазақстандағы паралимпиада қозғалысының дамуына негіз жасайды. Біз қордың елімізде инклюзивті қоғамның құрылуына үлес қосу жолында қолдау көрсетуге қуаныштымыз”, – деп атап өтті «ForteBank» АҚ Басқармасының төрағасы Талгат Куанышев.
Ұлттық құраманың Тайландқа Әлем кубогы дәрежесіне көтерілу кезеңіне баруы
2024 жылғы 13-19 наурыз аралығында Паттайя қаласында BNP Paribas World Team Cup арбадағы теннистен командалық әлем чемпионатының дәреже көтеру кезеңінен өтті. Қазақстан тарихында алғаш рет жарысқа ерлер де, әйелдер де қатысты.
2022 жылы Қазақстан теннис федерациясы елімізде арбадағы теннис пен бейімді теннисті белсенді түрде дамыта бастады. Осы уақыт ішінде төрт республикалық турнир ұйымдастырылып, олардың нәтижелері ұлттық құрама жасақтауға мүмкіндік берді. Бүгінгі күні ол халықаралық аренада Қазақстанның атынан шығып жүр.
Қазақстандық спортшылар тамаша өнер көрсеткенімен топтық кезеңнен өте алмады. Қытай (ерлер) және Тайланд (әйелдер) құрамалары азиялық дәреже көтеру кезеңінің жеңімпаздары және финалға қатысушылары болды.
Қарағандыда өткен Қазақстан кубогы
10-13 сәуір аралығында Қарағанды қаласында арбадағы теннистен ел тарихындағы екінші Қазақстан кубогы өтті. Жарысқа бес қаланың, яғни Астана, Алматы, Ақтөбе, Ақтау және Қарағанды қалаларының өкілдері қатысты.
Ерлер арасында жекелей сында ақтөбелік Дастан Неязов жеңімпаз атанды. Ерлер арасындағы жұптық сайыста Астана намысын қорғаған Динмухаммед Алиякпаров пен Кайнар Нурлыбек жеңіске жетті.
Әйелдер арасында жекелей сында қарағандылық Айжан Бутимбаева үздік атанды. Әйелдер арасындағы жұптық сайыста Қарағанды атынан жарысқан Айшуак Жетписова мен Айжан Бутимбаева жеңіске жетті.
Жасөспірімдер санатында ақтаулық Назар Трофимов бірінші болды. Командалық есепте Қарағанды командасы бірінші орынды иеленді. Екінші орын Ақтөбеге, үшінші орын Астанаға бұйырды.
Алматыдағы Almaty Open Wheelchair Tennis
2024 жылдың маусым айында Қазақстан тарихында Almaty Open Wheelchair Tennis тірек-қимыл аппараты функциялары бұзылған адамдарға арналған арбадағы теннистен алғашқы ашық турнир аяқталды.
Жарыс қорытындылары бойынша жеңімпаз атанғандар: • ерлер арасында жекелей сында – Дастан Неязов (Ақтөбе); • әйелдер арасында жекелей сында - Айжан Бутимбаева (Қарағанды); • ерлер арасындағы жұптық сайыста – Ердаулет Кадымбергенов және Ахтан Шонгарин (Ақтөбе); • аралас сында – Дастан Неязов (Ақтөбе) және Лёля Алексеева (Ақтөбе).
Турнирді Теннис федерациясының Алматы қалалық филиалы «ForteBank» АҚ және KPMG Kazakhstan ұйымдарының қаржылық қолдауымен ұйымдастырды, бұл ретте еріктілер де үлкен көмек көрсетті.
Ақтөбедегі Қазақстан Республикасының чемпионаты
13-17 тамыз аралығында Ақтөбеде арбадағы теннистен үшінші Қазақстан чемпионаты өтіп, оның қорытындысы бойынша еліміздің ұлттық құрамасы жасақталды. Биыл құрамаға қосылу үшін 40-тан астам спортшы бақ сынап, керемет табандылықпен қатар, жоғары дайындық деңгейін де көрсетті.
Чемпионат қорытындысы бойынша келесі жылға арналған стипендиаттардың құрамы жасақталады.
Алматыдағы оқу-жаттығу жиындары
Қазан айында Алматыда «Ace» теннис орталығында арбадағы теннистен ұлттық құраманың оқу-жаттығу жиындары басталды. Жиындар құраманың Грекиядағы ITF Futures сериясының халықаралық турнирлеріне қатысу қарсаңында өткізіледі.
Almaty Open шеңберіндегі көрнекі өнер көрсету
19 қазанда Almaty Arena орталық кортында Almaty open ATP 250 турнирі аясында арбадағы теннистен көрнекі өнер көрсету шарасы өтті. Оған Қазақстан ұлттық құрамасының мүшелері қатысты:
• Динмухамед Алиякпаров (Астана);
• Дастан Неязов (Ақтөбе);
• Айжан Бутимбаева (Қарағанды);
• Жанат Умуткулова (Ақтөбе);
• Айшуак Жетписова (Қарағанды).
Шараға арбадағы теннис бойынша жетекші жаттықтырушылар да қатысты:
• Ержан Исаков (Алматы);
• Жасулан Алниязов (Ақтөбе);
• Екатерина Нестерова (Қарағанды).
Грекияға шығу. Әйелдер құрамасының өкілдері топ-200 қатарына қосылды
Арбадағы теннистен Қазақстан ұлттық құрамасы ITF Athens Open турнирінде жарысты аяқтады. Жұптық сынның жартылай финалында Дастан Неязов пен Динмухамед Алиякпаров поляк теннисшілерінен жеңіліп қалды. Дегенмен біздің спортшылардың халықаралық турнирде алғаш рет жартылай финалға шығуы қазақстандық арбадағы теннис үшін тарихи жетістік болды.
Грекияда өткен ITF турнирлер сериясындағы сәтті жарыстан кейін арбадағы теннистен Қазақстан әйелдер құрамасының өкілдері әлем рейтингінің 200 үздігінің қатарына қосылды. Айжан Бутимбаева мен Жанат Умуткулова 140-шы, ал Айшуак Жетписова 168-ші орынды иеленді.