ForteBank - Қазақстан Тұрғын үй компаниясының жаңа бағдарламасына қатысқан алғашқы банк

«ForteBank» АҚ кешенді құрылыс жобаларын шартты қаржыландырудың жаңа тетігі аясында «Қазақстан Тұрғын үй Компаниясы» АҚ-мен («Бәйтерек» ҰИХ» АҚ еншілес ұйымы) ынтымақтастық туралы келісімге алғаш болып қол қойды.
Қаржыландыру аумақтарды кешенді дамыту талаптарына сәйкес келетін жобаларға ұсынылады. Олардың қатарында тұрғын үй, білім беру және денсаулық сақтау нысандарын, қоғамдық кеңістіктерді, автотұрақтар мен коммерциялық үй-жайларды салу, сондай-ақ кедергісіз орта қалыптастыру жобалары бар. Қолдау тұрғын үй құрылысының жаңа кешенді жобалары, қолданыстағы құрылыстарды жаңғырту мен заманауи қалалық орта қалыптастыруды көздейтін реновация жобаларына да көрсетіледі.
Келісім шеңберінде ҚТҮК ForteBank-ке шартты салым құралы арқылы қорландыру ұсына алады. Бұл Банкке жобаларды 36 айға дейінгі мерзімге, жылдығы 12,6%-тен аспайтын мөлшерлемеде қаржыландыруға мүмкіндік береді.
«ForteBank-пен келісімге қол қою шартты қаржыландыру тетігін іске қосудың маңызды кезеңі. Біздің мақсатымыз – нарыққа түсінікті әрі тиімді қаржылық құрал ұсыну. Ол құрылыс компанияларының қолжетімді банктік қаржыландыру тарту мүмкіндігін арттырып, реновация жобаларын қоса алғанда, сапалы кешенді құрылыс жобаларын жүзеге асыруға мүмкіндік береді», – деді «Қазақстан Тұрғын үй Компаниясы» АҚ Басқарма төрағасының орынбасары Исламбек Қайырбеков.
«Қазақстан Тұрғын үй компаниясымен жасалған келісім ForteBank-ке кешенді тұрғын үй құрылысы жобаларын қаржыландыруға мүмкіндік береді. Осы серіктестіктің арқасында біз девелоперлерге қаржыландырудың неғұрлым қолжетімді талаптарын ұсынып, Қазақстан бойынша заманауи инфрақұрылымды дамытуға және тұрғындар үшін жайлы орта қалыптастыруға ықпал ететін жобаларды жүзеге асыруға қолдау көрсете аламыз», – деп атап өтті ForteBank Басқарма мүшесі – Басқарушы директоры Алма Абильжанова.
Бұл ынтымақтастық құрылыс саласының банктік қаржыландыруға қолжетімділігін кеңейтуге, кешенді құрылыс жобаларының тұрақтылығын арттыруға және халықты сапалы әрі қолжетімді тұрғын үймен қамтамасыз ету жөніндегі мемлекеттік міндеттерді іске асыруға ықпал етеді.