ForteBank Datathon’26 аясында ЖИ арқылы бизнес-шешімдер әзірлеу кейсін ұсынды

ForteBank Datathon’26 шарасының бас демеушісі ретінде қатысушыларға деректерді талдау, машиналық оқыту және жасанды интеллект негізінде шешім әзірлеуге арналған өз бизнес-кейсін ұсынды. Студенттер мен жас мамандар өз шешімдерін 24 сағатта дайындап, ForteBank сарапшыларының бағалауына ұсынды.
Жарыс 17-18 қазан күндері Nazarbayev University базасында өтті. Оған Қазақстанның әр өңіріндегі жоғары оқу орындарынан 830 қатысушы жиналып, 275 команда жасақталды. 186 команда іріктеуден өтіп, өз жобаларын ұсынды. Олардың қатарынан 27 команда финалға шығып, қазылар алқасының алдында өз шешімдерін қорғады.
«Datathon біз үшін жас мамандардың деректер мен жасанды интеллект көмегімен нақты бизнес-мәселелерді қалай шешетінін көріп, бағалауға мүмкіндік береді. Біз ұсынылған шешімдердің техникалық сапасына ғана емес, олардың практикалық құндылығына, қойылған міндетке сәйкестігіне және болашақта кеңінен қолдану мүмкіндігіне де назар аудардық. Осындай жарыстар қатысушылар үшін өз білімдері мен дағдыларын шыңдап, бақ сынап көруге, тәжірибе жинау мүмкіндігі. Ал бизнес үшін жаңа идеялармен, әлеуеті жоғары мамандарды анықтаудың тиімді алаңы», – деді ForteBank Chief Data and AI Officer Нұржан Смайлов.
Datathon’26 шарасын ұйымдастырған Nazarbayev University жанындағы Data Science Club NU студенттік клубы. Жоба NU Impact Foundation қорының қолдауымен өтті. Клуб президенті Амина Байзактың айтуынша, ForteBank қолдауы қатысушыларға бизнес талаптарын тереңірек түсініп, қаржы секторының сарапшылармен байланыс орнатуға көмек болды.
Datathon’26-ның бас демеушісі ретінде ForteBank жас мамандарға практикалық тәжірибе жинауға, өз дағдыларын көрсетіп, сала сарапшыларымен тәжірибе алмасуға мүмкіндік берді.Мұндай жобалар білім беру қауымдастығы мен бизнес арасындағы өзара байланысты нығайтып, деректерді талдау мен жасанды интеллект саласындағы жаңа буын мамандарының кәсіби дамуына ықпал етеді.