ForteBank 10-шы мерейтойлық Forte Open қайырымдылық турнирін өткізді

Қазан айынығң 3-4 күндері Gorky Tennis Park теннис орталығында әуесқойлар арасындағы Forte Open қайырымдылық теннис турнирінің 10-шы мерейтойлық маусымы өтті. Бас жүлде үшін Алматы мен Астанадан келген 36 жұп бақ сынады. Оның 20-сы ер және 16-сы әйелдер жұбы. Қатысушылардың барлық жарналары балалар теннисін дамытуға бағытталды.
Биыл матчтар алты геймге дейінгі бір сет форматында өтті. Есеп тең болған жағдайда шешуші ұпай ойнатылды. Турнирдің алғашқы күні топтық кезең ойындары өтсе, екінші күні қатысушылар плей-офф кезеңінде бақ сынады.
Турнирді Forte Premier басқарушы директоры Мухаббат Сеитова ашты. Оның айтуынша, Forte Open он жыл ішінде теннис әуесқойларының басын қосқан маңызды алаңға айналды.
«Алғашқы Forte Open турнирі еске түсіп тұр, арада тура 10 жыл өтті. Бұл жарыстың әлі күнге дейін теннис жанкүйерлерін бір арнаға тоғыстырып келе жатқанына өте қуаныштымын. Сенім білдіріп, белсенділіп танытып қатысып жүргендеріңіз үшін және теннисті жақсы көріп, бағалайтындарыңыз үшін баршаңызға алғыс білдіремін», – деді Мухаббат Сеитова.
Қазақстан теннис федерациясының вице-президенті, Теннисті дамыту қорының бас директоры Ардақ Абижанов қатысушыларды Қазақстанның теннис тарихындағы маңызы бар маусыммен құттықтады. Оның айтуынша, Елена Рыбакина үшінші рет Үлкен дулыға турнирінің чемпионы атанып, алғаш рет WTA рейтингінің көшбасшысы болды.
«Қазақстан өкілі алғаш рет әлемнің бірінші ракеткасы атанды. Бұл біздің ел үшін тарихи жетістік. Баршаңызды осы айтулы оқиғамен құттықтаймын», – деді Ардақ Абижанов.
Сондай-ақ ол Қазақстандағы теннис инфрақұрылымын дамытудағы Қазақстан теннис федерациясының президенті Болат Өтемұратовтың қосқан үлесін атап өтті.
«Болат Өтемұратовтың қолдауымен елімізде заманауи теннис инфрақұрылымы қалыптасты және дамып келеді. Бүгінде Қазақстанда 39 теннис орталығы мен 394 теннис корты салынды. Қазіргі таңда 30 мың бала мен 15 мың әуесқой тенниспен айналысады. Бұл – отандық теннис үшін үлкен көрсеткіш әрі маңызды жетістік», – деді Ардақ Абижанов.
Алматы қаласында Forte Open турнирі 2016 жылдан бері өткізіліп келеді. Турнирдің ұйымдастырушылары – Forte Premier және Gorky Tennis Park. Алғашқы жарыстан бастап оның негізгі мақсаты өзгерген жоқ: теннис әуесқойларының басын қосу және балалар спортын қолдау.
Жарыс форматы жылдар бойы бірнеше рет өзгерді. Мәселен, 2017 жылы турнирге 80-нен аса адам қатысты: 24 ерлер жұбы және әуесқой ойыншы кәсіби теннисшімен бірге өнер көрсететін 16 Pro-Am жұбы бақ сынады. Ал 2020 жылы пандемияға байланысты турнир өткізілген жоқ, кейін жарыс 2021 жылы қайта жалғасты.
2024 жылдан бастап Forte Open толықтай әуесқойлар арасындағы турнирге айналды. Сол жылы турнирдің жүлде қоры 3 млн теңге болды. Он жыл бойы өзгермей келе жатқан негізгі ұстаным – қатысушылар жарнасы түгел қайырымдылық шарасына, оның ішінде балалар теннисін дамытуға жұмсалады. 2026 жылы қатысушылар жарнасы 4 млн теңгеден асты. Қаражат балалар теннисін қолдауға бағытталды.
Forte Open қатысушыларының жарнасы жыл сайын «Жасыл доп» санатында өтетін республикалық Forte Kids Open балалар қайырымдылық турнирін қаржыландырады. 2025 жылы турнир тоғызыншы рет ұйымдастырылып, 64 жас теннисші қатысты. Оның ішінде 18 ұл және 46 қыз бақ сынады.