ForteBank Алматы әуежайын қаржыландыруға арналған 670 млн АҚШ доллары көлеміндегі халықаралық мәмілеге қатысты

– ForteBank «Алматы халықаралық әуежайы» АҚ-қа жалпы сомасы 670 млн АҚШ доллары көлемінде қаржыландыру ұсынған халықаралық банк синдикатының құрамына кірді. ForteBank-тің мәмілеге қатысу үлесі – 50 млн АҚШ доллары. Қаржыландыру мерзімі 2033 жылғы 30 маусымға дейін.
Келісім 650 млн АҚШ доллары көлеміндегі мерзімді кредит пен 20 млн АҚШ доллары көлеміндегі қайта жаңартылатын кредиттік желіні қамтиды. Мәміле ұйымдастырушысы – Bank of America Europe DAC.
Қаражаттың бір бөлігі әуежайды сатып алу және жаңа халықаралық терминал салу үшін бұрын тартылған қарыздарды қайта қаржыландыруға жұмсалады. Сонымен қатар, бөлінген қаржы аэродром инфрақұрылымын, мұздануға қарсы өңдеу нысандарын және жүк терминалын одан әрі дамытуға мүмкіндік береді. Ал қайта жаңартылатын кредиттік желі қаражаты әуежайдың айналым капиталын толықтыруға арналған.
«Алматы әуежайы өңірдегі маңызды көлік торабы саналады. Оның дамуы бүкіл аймақтың одан әрі өркендеуіне ықпал етеді. Сондықтан бұл мәмілеге қатысу ForteBank-тің халықаралық қаржы институттарымен бірлесіп ірі инфрақұрылымдық жобаларды жүзеге асыруға қабілетті екенін көрсетеді», – деді «ForteBank» АҚ Басқарма Төрағасы Талғат Қуанышев.