Кредитке қатысты ақиқат: сарапшылар қарыз, алаяқтық және қаржылық қауіпсіздік мәселелерін талқылады

Л.Н. Гумилев атындағы Еуразия ұлттық университетінде жастардың қаржылық сауаттылығына арналған «Кредитке қатысты ақиқат: мүмкіндіктер, тәуекелдер және жауапкершілік» форумы өтті.
Банк саласының мамандары, Fingramota.kz жобасының өкілдері және құқық қорғау органдарының қызметкерлері студенттерге кредит, банк қызметтерін қауіпсіз пайдалану, қарыз жүктемесін дұрыс есептеу және жеке қаржылық стратегияны қалыптастыру жолдары туралы ақпарат берді. Сондай-ақ алаяқтық, дропперлік, дербес деректерді қорғау және антифрод-жүйелердің жұмысына ерекше назар аударылды. Қатысушыларға бірнеше кредитор алдындағы мерзімі өткен берешекті реттеуге көмектесетін Finkelisim.kz платформасы да таныстырылды.
ЕҰУ-дың әлеуметтік және инфрақұрылымдық даму жөніндегі проректоры Ләззат Төлегенқызы цифрлық экономиканың қарыштап тұрған тұсында студенттерге сыни ойлау қабілет, жеке қаржысына жауапкершілікпен қарау және қаржылық жоспарлау дағдысын қалыптастырудың маңызды екенін атап өтті.
Қазақстан Республикасы Қаржы нарығын реттеу және дамыту агенттігінің Fingramota.kz жобасының жетекшісі Айгүл Қанатбаева жастар үшін қаржылық сауаттылық негізгі дағдылардың біріне айналып келе жатқанын айтты. Оның айтуынша, жастар қаржылық өнімдерді пайдалануды ғана емес, күмәнді ұсыныстарды ажыратып, алаяқтардың айла-тәсілдерін ажырата білуі керек.
Форумның бірінші бөлігінде сарапшылар кредитті сауатты пайдалану мен қаржылық шешімдерді жауапкершілікпен қабылдаудың маңызына тоқталды. ForteBank атқарушы директоры Андрей Гриненко банк өнімдерін таңдау, карталар мен кредиттерді қауіпсіз пайдалану жолдары және қарыз ресімдер алдында оның талаптарын мұқият зерделеп, өз қаржылық мүмкіндіктерін бағалаудың маңызы туралы айтып берді.
Қаржы сарапшысы әрі блогер Батырхан Елемесов кредит алар алдында нені ескеру қажет екенін түсіндіріп, табысты тиімді бөлу, жинақ қалыптастыру және жеке қаржыны дұрыс басқару жөнінде кеңестерімен бөлісті.
Форум қатысушыларына Finkelisim.kz платформасы таныстырылды. Айгүл Қанатбаеваның айтуынша, сервис бірнеше кредитор алдында мерзімі өткен берешегі бар азаматтарға арналған. Платформа арқылы берешекті реттеу туралы өтініш беріп, оны өтеудің бірыңғай кестесін алуға болады.
Форумның екінші бөлігі қаржылық алаяқтық, дропперлік және дербес деректерді қорғау тақырыбына арналды. Астана қаласы Полиция департаментінің өкілі Бағдәулет Оспанбаев Алаяқтардың арбауына түсудің салдары мен дропперліктің қауіпі туралы ақпарат берді.
ForteBank Antifraud талдау және жүргізу тобының жетекшісі Әсел Сәдуақасова банк тәжірибесі негізінде антифрод-жүйелердің қалай жұмыс істейтінін және күмәнді операцияларды анықтау мен олардың алдын алу үшін қандай тетіктер қолданылатынын түсіндірді.
Форум барысында қатысушылар нақты алаяқтық жағдайларын талдап, жеке деректер мен қаржыны қорғаудың практикалық тәсілдерін талқылады. Іс-шара соңында Fingramota.kz қаржылық квизге арналған бейнероликтер байқауының қатысушыларын марапаттады. Барлығы 10 жұмыс ұсынылған, олардың ішіндегі ең үздіктерін еліміздің барлық өңірлерінде көрсету жоспарланып отыр. Бейнероликтер жоба¬ның Instagram-парақшасында жарияланған.