Fitch Ratings ForteBank-тің рейтингін «BB» деңгейінде тұрақты болжаммен растады

Fitch Ratings есебінде рейтингтің расталуына ForteBank-тің Home Credit Bank-ті сатып алғаннан кейінгі нарықтағы позициясының нығаюы, бизнестің жоғары табыстылығы және өтімділік деңгейінің тұрақтылығы негіз болғанын атап өтті. Агенттіктің бағалауынша, біріккен банктің активтер бойынша нарықтағы үлесі 9,1%- ке ұлғайып, бәсекелестік артықшылықтарын күшейтіп, Қазақстанның жүйе құрушы банктерінің қатарына қосылу мүмкіндігін арттырды.
Fitch Ratings агенттігінің бағалауынша, Home Credit Bank-ті сатып алудың нәтижесінде қалыптасатын синергиялық тиімділік кросс-сатылым мүмкіндіктерін кеңейту, операциялық тиімділікті арттыру және жекелеген бизнес-процестерді оңтайландыру арқылы банк үшін қосымша құнын арттырады. Агенттік бұл артықшылықтар алдағы бірнеше жыл ішінде кезең-кезеңмен толық жүзеге асатынына сенім білдіреді.
Fitch Ratings сондай-ақ, ForteBank -тің капитал базасын нығайтуға бағытталған саясатын жоғары бағалады. Агенттік 2026 жылғы маусымда банк капиталының 46,1 млрд теңгеге ұлғайтылғанын ескеріп, 2026 - 2027 жылдары капиталдандыру көрсеткіштері одан әрі жақсарады деп болжам жасап отыр.
Есепте ForteBank-тің қорландыру базасының тұрақтылығы мен өтімділік деңгейі жоғары бағаланған. 2025 жылы бөлшек депозиттер көлемі 49%-ке өсті. Сонымен бірге Home Credit Bank-пен бірігудің синергиялық әсері банктің ресурстық базасын одан әрі әртараптандыруға мүмкіндік берді.
«Fitch Ratings рейтингінің расталуы – ForteBank бизнес-моделінің тұрақтылығына берілген тәуелсіз баға. Агенттік біздің негізгі артықшылықтарымызды, атап айтқанда нарықтағы позициямыздың нығаюын, Home Credit Bank-пен бірігуден күтетін синергиялық әсерді, жоғары өтімділікті және капитал базасының жүйелі түрде күшейіп келе жатқанын атап өтті. Біз ForteBank нарықтағы орнымызды одан әрі нығайтып, әмбебап бизнес-моделімізді дамытуды және клиенттер, серіктестер мен инвесторларымыз үшін ұзақ мерзімді құндылық қалыптастыруды жалғастырамыз», – деді «ForteBank» АҚ Басқарма Төрағасы Талғат Қуанышев.